ក្រោយ​បង្កើត​សហគមន៍​ជី​ផាត​ជាង​១០​ឆ្នាំ ពលរដ្ឋ​ស្ទើរ​១០០​ភាគរយ នៅ​ឃុំ​ជី​ផាត ស្រុក​ថ្មបាំង មិន​ធ្វើ​ចំណាកស្រុក​ឡើយ​

(​កោះកុង​)៖ បន្ទាប់​ពី​បង្កើត​ជា​សហគមន៍​អេកូ​ទេសចរណ៍​ជី​ផាត​ចាប់តាំងពី​ឆ្នាំ​២០០៧​មក បាន​ប្រែ​មុខមាត់​តំបន់​ដាច់ស្រយាល​នេះ​យ៉ាងខ្លាំង គឺ​បាន​កាត់បន្ថយ​ការធ្វើ​ចំណាកស្រុក​របស់​ប្រជាពលរដ្ឋ​ស្ទើរតែ​១០០​ភាគរយ​។ ប្រជាពលរដ្ឋ​នៅក្នុង​ឃុំ​ជី​ផាត ស្រុក​ថ្មបាំង ខេត្ត​កោះកុង បាន​ងាក​មក​ប្រកប​របរ​ដាំ​ដំណាំ នាំ​ភ្ញៀវទេសចរ​ដើរ​កម្សាន្ត និង​ប្រកប​របរ​ផ្សេងៗ​ទៀត ដើម្បី​បំពេញ​តម្រូវការ​ភ្ញៀវទេសចរ​។​

​ថ្លែង​ប្រាប់​ក្រុម​ការងារ «Mercedes-Benz និង​កំណប់​អាថ៌កំបាំង​» ដែលជា​អ្នក​តាម​ប្រមាញ់​តំបន់​ទេសចរ​ថ្មីៗ​នៅ​កម្ពុជា នា​ថ្ងៃ​ទី​១៨ ខែ​កុម្ភៈ ឆ្នាំ​២០១៩ លោក សូ លី​ហៀ​ង ប្រធានស្តីទី​សហគមន៍​អេកូ​ទេសចរណ៍​ជី​ផាត បាន​ថ្លែង​យ៉ាង​ដូច្នេះ​ថា «​សម្រាប់​បញ្ហា​ចំណាកស្រុក គឺ​កាត់​បន្ថយ​បាន​សឹងតែ​១០០​ភាគរយ​តែ​ម្តង​»​។​

​លោក សូ លី​ហៀ​ង បាន​បន្តថា អ្វី​ដែល​កាន់តែ​ពិសេស​ជាង​នេះ​ទៀត​នោះ សហគមន៍​អេកូ​ទេសចរណ៍​ជី​ផាត បាន​បែងចែក​ប្រាក់​វិភាគទាន​សម្រាប់​កសាង​ប្រព័ន្ធ​លូ ជួសជុល​ផ្លូវ និង​បែងចែក​ដល់​សមាជិក​ស​ហគ​ន៍ ដែល​បម្រើការ​សេវា​ជូន​ភ្ញៀវ​ទេសចរ​នៅក្នុង​សហ​គន៍​ផងដែរ​។​

​បើ​តាម​ប្រធានស្តីទី​រូបនេះ សព្វថ្ងៃ​ឃុំ​ជី​ផាត​មាន​ប្រជាពលរដ្ឋ​ជាង ៦០០​គ្រួសារ ហើយ​មាន​ពលរដ្ឋ ៣៦២​គ្រួសារ​ជា​សមាជិក​របស់​សហគម​ន៍ ដូច្នេះ​ពួកគាត់​អាច​ទាញ​ប្រយោជន៍​ពី​សហ​គន៍​ដូចជា​៖ ធ្វើ​ជា​ចុងភៅ​ភូមិ ចុងភៅ​ព្រៃ មគ្គុទេ្ទសក៏​នាំ​ភ្ញៀវ​ដើរ​ទស្សនា​កន្លែង​កម្សាន្ត​នានា​នៅក្នុង​តំបន់​អេកូ​ទេសចរណ៍​ជី​ផាត​។​

​លោក សូ លី​ហៀ​ង បានបញ្ជាក់​ថា នៅ​ឆ្នាំ​១៩៩៨ នៅ​ជី​ផាត មាន​សកម្មភាព​កាប់បំផ្លាញ​ព្រៃឈើ ការទន្ទ្រាន​ព្រៃ​យក​ដី​ធ្វើស្រែ និង​បរបាញ់​សត្វព្រៃ យ៉ាង​អនាធិបតេយ្យ​ខ្លាំង​មែនទែន ប៉ុន្តែ​ដោយ​មាន​ការមើលឃើញ និង​ជួយ​ជ្រោមជ្រែង​ពី​អង្គការ វ៉ា​យ​ឡែ​ហ្វ ឡាយ​អ៊ិន បាន​កាត់បន្ថយ និង​លុបបំបាត់​សកម្មភាព​ទាំងនេះ​ជា​បណ្ដើរៗ រហូតដល់​មានការ​ចងក្រង​ឯកសារ​មួយចំនួន​ជាមួយ​អាជ្ញាធរ​ដែនដី និង​ប្រជាពលរដ្ឋ​ចំនួន ៤​ភូមិ នៅក្នុង​ឃុំ​ជី​ផាត​នេះ បង្កើត​ទៅ​ជា​សហគមន៍​ឡើង​។​

​សូមជម្រាបថា សហគមន៍​អេកូ​ទេសចរណ៍​ជី​ផាត ត្រូវបាន​បង្កើត​ឡើង​តាំងពី​ឆ្នាំ​២០០៧ ក្នុង​គោលបំណង​ចូលរួម​ថែរក្សា​ការពារ​បរិស្ថាន ធនធានធម្មជាតិ ព្រៃឈើ និង​សត្វព្រៃ​ជាដើម​៕​