(ភ្នំពេញ)៖កាលពីព្រឹកថ្ងៃសុក្រ ៩កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៩ ខែសីហា ឆ្នាំ២០១៩ ក្រសួងទេសចរណ៍ សហការជាមួយក្រុមហ៊ុន GIGB Business Investment (Cambodia) Co., Ltd បានរៀបចំវគ្គបណ្តុះបណ្តាលជនបង្គោលស្តីពី “ប្រព័ន្ធបច្ចេកវិទ្យា E-Certificate សម្រាប់ការបណ្តុះបណ្តាលវិជ្ជាជីវៈទេសចរណ៍” ដល់មន្ត្រីក្រសួងទេសចរណ៍ និងមន្ទីរទេសចរណ៍រាជធានី-ខេត្ត បុគ្គលិកសាកលវិទ្យាល័យ សាលាវិជ្ជាជីវៈ និងគ្រឹះស្ថានបណ្តុះបណ្តាលវិជ្ជាជីវៈទេសចរណ៍ដែលទទួលស្គាល់ដោយក្រសួងទេសចរណ៍ ក្រោមអធិបតីភាព ឯកឧត្តម ណេប សាមុត អគ្គនាយកគ្រប់់គ្រងឧស្សាហកម្មទេសចរណ៍។ 
ប្រព័ន្ធ E-Certificate គឺជាប្រព័ន្ធ Intranet សម្រាប់ការបណ្តុះបណ្តាលវិជ្ជាជីវៈទេសចរណ៍ដែលមានមុខងារសំខាន់ៗដូចជា៖(១)-ជួយសម្រួលដល់ការចេញវិញ្ញាបនបត្រច្រើនប្រភេទដូចជាដល់វគ្គបណ្តុះបណ្តាលដោយក្រសួង មន្ទីរទេសចរណ៍ ឬដោយសាលាវិជ្ជាជីវៈទេសចរណ៍ដែលទទួលស្គាល់ពីក្រសួងទេសចរណ៍ (២)-ជួយដល់ការគ្រប់គ្រងការបណ្តុះបណ្តាលវិជ្ជាជីវៈទេសចរណ៍តាមអនឡាញ (៣)-បញ្ជាក់អត្ថសញ្ញាណ Profile របស់សិស្ស-និសិ្សត និងអ្នកចូលរួមវគ្គបណ្តុះបណ្តាល(៤)-រក្សាទិន្នន័យ និងតាមដានជំនាញវិជ្ជាជីវៈរបស់សិស្ស-និសិ្សត (Tourism Skill Passport)។
ប្រព័ន្ធ E-Certificate នេះនឹងផ្តល់ភាពងាយស្រួលដល់សាកលវិទ្យាល័យ គ្រឹះស្ថានបណ្តុះបណ្តាលវិជ្ជាជីវៈទេសចរណ៍ និងសិស្ស-និសិ្សត ក្នុងការគ្រប់គ្រង និងរក្សាទុកទិន្នន័យ និងព័ត៌មានចាំបាច់នានា ដោយមិនភ័យព្រួយក្នុងការបាត់បង់ ឬការក្លែងបន្លំ និងក្លាយជាឧបករណ៍ដ៏សំខាន់ក្នុងការគាំទ្រដល់យុទ្ធសាស្រ្តអភិវឌ្ឍធនធានមនុស្សក្នុងវិស័យទេសចរណ៍(២០១៨-២០២៥) ឆ្ពោះទៅសម្រេចបានគោលដៅ “បុគ្គលិកម្នាក់ជំនាញ មួយ” ឱ្យបាននៅឆ្នាំ២០២៥ និងការសិក្សាពេញមួយជីវិត (Long Life Learning) នៅឆ្នាំ២០៣០ សម្រាប់យុវជនកម្ពុជានៅក្នុងវិស័យទេសចរណ៍។ 
ប្រព័ន្ធនេះទៅថ្ងៃអនាគតនឹងត្រូវក្លាយជា Platform មួយដែលអាចផ្គូរផ្គង (Matching) ជាមួយប្រព័ន្ធស្នើសុំអាជ្ញាបណ្ណទេសចរណ៍អនឡាញដោយស្វ័យប្រវត្តិដែលផ្តល់ភាពងាយស្រួលក្នុងការគ្រប់គ្រង និងសម្រួលឱកាសឱ្យយុវជនកម្ពុជាដែលកំពុងបំរើការងារក្នុងវិស័យទេសចរណ៍អាចទទួលបានការលើកទឹកចិត្តពីម្ចាស់អាជីវកម្មទេសចរណ៍ឱ្យទៅពង្រឹងសមត្ថភាពជំនាញវិជ្ជាជីវៈ(In-House Training) ឬក្នុងការហ្វឹកហាត់ការងារ Apprenticeship) ជាដើម។ 
សូមបញ្ជាក់ថាប្រព័ន្ធបច្ចេកវិទ្យាគ្រប់គ្រងការបណ្តុះបណ្តាលវិជ្ជាជីវៈទេសចរណ៍នេះគ្រោងនឹងប្រកាសដាក់ជាផ្លូវការក្រោមអធិបតីភាពដ៏ខ្ពង់ខ្ពស់របស់ ឯកឧត្តម ថោង ខុន រដ្ឋមន្រ្តីក្រសួងទេសចរណ៍ នាចុងខែកញ្ញា ឆ្នាំ២០១៩ ខាងមុខនេះ។ 
នាយកដ្ឋាន មន្ទីរទេសចរណ៍ សាកលវិទ្យាល័យ និងគ្រឹះស្ថានបណ្តុះបណ្តាលវិជ្ជាជីវៈទេសចរណ៍អាចស្នើសុំប្រើប្រាស់ប្រព័ន្ធ E-Certificate បានតាមរយៈគេហទំព័រ៖ www.tourismecertificate.org ឬស្គេន QR-Code: