(ភ្នំពេញ)៖ នាព្រឹកថ្ងៃទី១២ ខែកញ្ញា ឆ្នាំ២០១៩ នៅគណ:កម្មាធិការជាតិអូឡាំពិកកម្ពុជា (NOCC ) ក្រសួងទេសចរណ៍បានបើកសិក្ខាសាលាពង្រឹងសមត្ថភាពជនបង្គោលយេនឌ័រក្នុងវិស័យទេសចរណ៍ស្តីពី " ភាពជាអ្នកដឹកនាំ និងការបង្កើនភាពអង់អាចផ្នែកសេដ្ឋកិច្ចដល់ស្ត្រី " ក្រោមអធិបតីភាពលោកជំទាវ ហ៊ុន ដានី រដ្ឋលេខាធិការក្រសួងទេសចរណ៍ ។

សិក្ខាសិលានេះរៀបចំឡើងក្នុងគោលបំណងដើម្បីបំប៉នសមត្ថភាពជនបង្គោលយេនឌ័រនៅតាមមន្ទីរទេសចរណ៍ រាជធានី-ខេត្ត និងផ្នែកឯកជនឲ្យយល់ច្បាស់ពីសិល្ប៍វិធីក្នុងការនិយាយជាសាធារណៈ ភាពជាអ្នកដឹកនាំ ការបង្កើនភាពអង់អាចផ្នែកសេដ្ឋកិច្ចដល់ស្រ្តី និងគោលនយោបាយយេនឌ័រក្នុងវិស័យទេសចរណ៍។

ថ្លែងក្នុងពិធីនោះលោកជំទាវ ហ៊ុន ដានី បានលើកឡើងថា “ការអប់រំបណ្តុះបណ្តាលធនធានមនុស្សក្នុងវិស័យទេសចរណ៍ មានគោលដៅជំរុញការបង្កើនភាពអង់អាចដល់ស្រី្ត” ។ ការបង្កើនភាពអង់អាចផ្នែកសេដ្ឋកិច្ចដល់ស្ត្រី សំដៅដល់ការកសាងសមត្ថភាពធនធានមនុស្ស ជាពិសេសស្ត្រីដើម្បីចូលរួមប្រកួតប្រជែងប្រកបដោយនវានុវត្តន៍នៅក្នុងទីផ្សារការងារក៏ដូចជាបង្កើនសមត្ថភាពរបស់ពួកគេឲ្យចេះសម្របខ្លួនទៅនឹងការផ្លាស់ប្តូរ ការបត់បែន និងឆ្លាតវៃ ដើម្បីក្លាយទៅជាសហគ្រិន និងបុគ្គលិកដ៏ជោគជ័យ អាចឈានទៅពង្រឹងស្ថានភាពសេដ្ឋកិច្ចផ្ទាល់ខ្លួន គ្រួសារ សហគមន៍ និងសង្គមជាតិ។

គោលដៅនៃការបង្កើនភាពអង់អាចដល់ស្ត្រីគឺដើម្បី៖
១. កាត់បន្ថយភាពរងគ្រោះរបស់ស្ត្រី
២. រក្សាកំណើនសេដ្ឋកិច្ច
៣. ពង្រឹងតួនាទីក្នុងភាពជាដៃគូរបស់បុរសក្នុងសង្គមដែលមិនអាចខ្វះបាន៕