សមាគមក្លឹបទេសចរណ៍សៀមរាប (STC) បានរៀបចំព្រឹត្តិការណ៍ប្រកួតវាយកូនហ្គោលលើកទី៤ ដែលលើកនេះធ្វើឡើងដើម្បីរៃអង្គាសថវិកាជួយសិស្សក្រីក្រ៣០០នាក់ និងផ្សព្វផ្សាយវិស័យ​កីឡាកូនហ្គោល​ដល់ទេសចរ។

លោក ហ្វីលីព សែត កៅ ប្រធានក្លឹប STC បានឲ្យដឹងថា ព្រឹត្តិការណ៍កីឡាប្រកួតវាយកូនហ្គោល មនុស្សធម៌នេះ មានការចូលរួមពីកីឡាខ្មែរនិងបរទេសសរុប៤០នាក់ ដើម្បីរួមចំណែកជួយដល់ការសិក្សា និងផ្លាស់ប្ដូរអនាគតជាវិជ្ជមានដល់សិក្ខា៣០០នាក់ ក្នុងគម្រោង Pre-Employment Program។ លោកបន្ថែមថា គម្រោងនេះផ្តោតសំខាន់លើយុវជន យុវតី នៅតំបន់ដាច់ស្រយាលទាំង១២ស្រុកក្នុងខេត្ត សៀមរាប ដែលពួកគេមានជីវភាពខ្វះខាត និងមិនអាចបន្តការសិក្សាបានខ្ពស់។ សមាគមបានបង្កើតគម្រោងនេះឡើងនៅឆ្នាំ ២០១៩ ក្នុងបំណងបណ្ដុះបណ្ដាលបង្កើនសមត្ថភាព ដល់យុវជនងាយរងគ្រោះដែលដើរស្របតាមយុទ្ធសាស្រ្តរបស់រាជរដ្ឋាភិបាល។

លោក ហ្វីលីព ក៏បានថ្លែងអំណរគុណដល់សប្បុរសជនចូលរួមនាពេលកន្លងមក ដែលរំលេចភាពជាដៃគូ ដ៏ល្អឥតខ្ចោះ និងដើរលើឆន្ទះរួមមួយគឺជួយក្មេងៗដែលខ្វះខាតឱ្យមានឱកាសបានទទួលបានការសិក្សា បង្កើតការងារដល់ពួកគេ បណ្ដុះគោលដៅនិងអាជីពមួយជាក់លាក់ដល់ពួកគេនាពេលអនាគត ក៏ដូចជាកាត់បន្ថយភាពក្រីក្រ និងចំណាកស្រុក ចូលរួមលើកកម្ពស់ជាពិសេសក្មេងស្រីឱ្យមានអាជីព ឯករាជ្យភាពផ្នែកហិរញ្ញវត្ថុ។

កម្មវិធីប្រកួតនេះមានពីរថ្ងៃ គឺរសៀលថ្ងៃទី៣០ ខែកញ្ញា នៅទីលានវាលកូនហ្គោល ភូកីត្រាខោនទ្រីហ្គោលក្លឹប និងថ្ងៃទី១ ខែតុលា នៅអង្គរហ្គោលក្លឹប។ ថវិកាដែលទទួលបាន សមាគមនឹងបរិច្ចាគទាំងអស់ទៅគម្រោងជួយយុវជនទាំង៣០០នាក់។

សូមបញ្ជាក់ថា ក្រុមហ៊ុនដែលបានឧបត្ថម្ភក្នុងកម្មវិធីនេះរួមមាន HSC Beverages Co.,Ltd Angkor Wildlife & Acquarium Cambodian Golf Distribution មជ្ឈមណ្ឌលបណ្ដុះសច្ចៈ ក្រុមហ៊ុនផ្គត់ផ្គង់ម្ហូបអាហារ Lee’s Food Service Ltd ក្រុមហ៊ុនផ្គត់ផ្គង់សម្ភារកីឡាវាយហ្គោល Ecgolfhouse/ Srixon Cambodia ផ្សារទំនើបអង្គរ និងក្រុមហ៊ុនទឹកបរិសុទ្ធ Eau Lulen។ល៕