ឯកឧត្តមរដ្ឋមន្ត្រី ថោង ខុន៖ ពេលមានទឹកជំនន់យើងនៅចាំជួយពលរដ្ឋគ្រប់ពេល, ក្រោយពេលទឹកជំនន់យើងក៏នឹងត្រៀមជានិច្ចដើម្បីជួយពលរដ្ឋ

(កំពង់ធំ)៖ ក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានថ្លែងទៅកាន់ប្រជាពលរដ្ឋថា ទោះបីស្ថិតក្នុងពេលមានទឹកជំនន់ និងក្រោយពេលទឹកជំនន់នេះ រាជរដ្ឋាភិបាល និងអាជ្ញាធរគ្រប់លំដាប់ថ្នាក់នៅតែត្រៀមចាំអន្តរាគមន៍ជួយប្រជាពលរដ្ឋគ្រប់ពេលវេលា ហើយនៅក្រោយពេលទឹកជំនន់នេះទៅ ក្រុមការងារនឹងជួយដោះស្រាយផលប៉ះពាល់ជូនប្រជាពលរដ្ឋបន្តទៀត ពិសេសគឺប្រព័ន្ធហេដ្ឋានរចនាសម្ពន្ធ និងការបង្កបង្កើនផល។
ការបញ្ជាក់យ៉ាងដូច្នេះត្រូវបានលើកឡើងនាឱកាសឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ព្រមទាំងឯកឧត្តម សុខ លូ អភិបាលខេត្តកំពង់ធំ បានដឹកនាំមន្ត្រីក្នុងក្រុមការងារ និងមន្ត្រីខេត្តចុះចែកអំណោយជាគ្រឿងឧបភោគ-បរិភោគ និងថវិកាមួយចំនួនជូនដល់ប្រជាពលរដ្ឋ ៣៥០គ្រួសារ មកពីឃុំចំនួន ៥ នៅស្រុកប្រាសាទសំបូរ នារសៀលថ្ងៃទី២០ ខែតុលា ឆ្នាំ២០២០។
នាឱកាសនោះ ឯកឧត្តមរដ្ឋមន្ត្រី ថោង ខុន បានពាំនាំនូវការផ្ដាំផ្ញើសួរសុខទុក្ខរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជម្រាបដល់ប្រជាពលរដ្ឋ ដែលសម្ដេចទាំងទ្វេតែងតែនឹករឭក និងគិតគូរយកចិត្តទុកដាក់ពីសុខទុក្ខរបស់ប្រជាពលរដ្ឋគ្រប់កាលៈទេសៈ «ទីណាមានពលរដ្ឋជួបទុក្ខ ទីនោះមានមុខសម្ដេចតេជោ និងសម្ដេចកិត្តិព្រឹទ្ធបណ្ឌិត»។
ឯកឧត្តមបណ្ឌិត ថោង ខុន បានបញ្ជាក់ថា រាជរដ្ឋាភិបាលក្រោមការដឹកនាំរបស់សម្ដេចតេជោ ក្រុមការងាររាជរដ្ឋាភិបាលចុះមូលដ្ឋានខេត្ត និងអាជ្ញាធរខេត្ត-ស្រុក មិនបានទុកឱ្យប្រជាពលរដ្ឋរងគ្រោះលំបាកឡើយ ពោលទោះបីជាស្ថិតក្នុងពេលមានទឹកជំនន់ និងក្រោយពេលទឹកជំនន់នេះ ក៏នៅតែត្រៀមចាំអន្តរាគមន៍ជួយប្រជាពលរដ្ឋគ្រប់ពេលវេលាបន្តទៀតដែរ។
ឯកឧត្តមក៏បានអំពាវនាវឱ្យប្រជាពលរដ្ឋត្រូវរក្សាទឹកទុកសម្រាប់ប្រើប្រាស់ទៅថ្ងៃមុខ និងទុកក្នុងស្រែដើម្បីឱ្យស្រូវមានការលូតលាស់ល្អ ពិសេសត្រូវត្រៀមស្រូវពូជ ឬគ្រាប់ពូជដំណាំផ្សេងទៀត ដើម្បីបង្កបង្កើនផលនៅរដូវក្រោយ។
ឯកឧត្តមរដ្ឋមន្ត្រីបានក្រើនរំឭកបន្ថែមដល់ប្រជាពលរដ្ឋឱ្យត្រូវចូលរួមថែរក្សាសុខភាពឱ្យបានល្អ តាមរយៈការហូបស្អាត ផឹកស្អាត រស់នៅស្អាត និងប្រកបដោយអនាម័យខ្ពស់។ ម្យ៉ាងទៀត ក៏ត្រូវប្រកាន់ខ្ជាប់នូវការអនុវត្តវិធានសុវត្តិភាព និងគោលការណ៍ណែនាំរបស់ក្រសួងសុខាភិបាលក្នុងការប្រយុទ្ធប្រឆាំងនឹងជំងឺកូវីដ-១៩ ឱ្យបានល្អ។ ពលរដ្ឋមានសុខភាពល្អ សុខភាពប្រទេសជាតិក៏រឹងមាំល្អ។
ជាមួយគ្នានោះ ឯកឧត្តម សុខ លូ ក៏បានឱ្យដឹងដែរថា ជំនន់ទឹកភ្លៀងនេះបានបង្កឱ្យប៉ះពាល់ដល់លំនៅដ្ឋានប្រជាពលរដ្ឋទូទាំងខេត្តចំនួន ៦,៩៥៥ខ្នង ក្នុងនោះនៅស្រុកប្រាសាទសំបូរចំនួន ១២៣,៣៥៦ខ្នង ស្រុកសន្ទុកចំនួន ៣៣០ខ្នង ស្រុកតាំងគោកចំនួន ១០០ខ្នង ស្រុកស្ទោងចំនួន ៤,៥២៣ខ្នង ស្រុកបារាយណ៍ចំនួន ២៧៥ខ្នង ស្រុកសណ្ដាន់ចំនួន ៦១៥ខ្នង ស្រុកប្រាសាទបល្ល័ង្កចំនួន ៣៧៦ខ្នង ស្រុកកំពង់ស្វាយចំនួន ១១២ខ្នង និងក្រុងស្ទឹងសែនចំនួន ២៦៨ខ្នង។
ថ្នាក់ដឹកនាំទាំងពីរបានបន្តដាស់តឿនដល់មន្ត្រីមូលដ្ឋានថា ប្រសិនបើមូលដ្ឋានក្រុង-ស្រុកណាមួយ ស្ថានភាពទឹកស្រកចុះទៅវិញហើយ ត្រូវត្រៀមជួសជុល ឬដោះស្រាយទៅតាមភាពជាក់ស្ដែង ដើម្បីកាត់បន្ថយការលំបាករបស់ប្រជាពលរដ្ឋក្នុងមូលដ្ឋានរបស់ខ្លួន។
គួរបញ្ជាក់ថា អំណោយដែលត្រូវចែកជូនប្រជាពលរដ្ឋទាំង ៣៥០គ្រួសារ នៅស្រុកប្រាសាទសំបូរនោះ ដោយក្នុងមួយគ្រួសារទទួលបានអង្ករ ២៥គីឡូក្រាម មីជាតិ ១កេស ត្រីខកំប៉ុង ១យួរ ទឹកត្រី ១យួរ ទឹកបរិសុទ្ធ ១កេស និងថ្នាំពេទ្យ Tiffy ៥បន្ទះ។
នាឱកាសជួបសំណេះសំណាលនោះ ឯកឧត្តមរដ្ឋមន្ត្រី ថោង ខុន ក៏បានអំពាវនាវឱ្យប្រជាពលរដ្ឋត្រូវចូលរួមថែរក្សាសម្បត្តិបេតិកភណ្ឌ និងកេរដំណែលដូនតាក្នុងតំបន់ប្រាសាទសំបូរព្រៃគុកនេះ ព្រោះតំបន់បេតិកភណ្ឌពិភពលោករបស់កម្ពុជាមួយនេះ ពិតជាមានតម្លៃដ៏មហាសាលដែលអាចទាក់ទាញភ្ញៀវទេសចរបានច្រើន និងអាចជួយឱ្យប្រជាសហគមន៍នៅជុំវិញរកចំណូលបានច្រើនទៀតផង។
ថ្នាក់ដឹកនាំទាំងពីរបានថ្លែងអំណរគុណដល់សប្បុរសជន ដែលជាសមាសភាពនៅក្នុងក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងថ្នាក់ដឹកនាំ-មន្ត្រីរាជការនៃក្រសួងទេសចរណ៍ (មានបញ្ជីភ្ជាប់នៅខាងក្រោម) ដែលបានរួមចំណែកឧបត្ថម្ភដល់សកម្មភាពចុះជួបសំណេះសំណាល និងចែកអំណោយដល់ប្រជាពលរដ្ឋរងគ្រោះដោយសារគ្រោះជំនន់ទឹកភ្លៀងនៅស្រុកស្ទោង ស្រុកប្រាសាទសំបូរ និងស្រុកតាំងគោក សរុបប្រមាណជិត ១,០០០គ្រួសារ៕

This website, Tourismcambodia.org, the official website of Ministry of Cambodia of the Kingdom of Cambodia, is designed and maintained collaboratively by RED DOT (Cambodia) Co., Ltd and Cybernetics Ltd a full service branding and advertising agency in Cambodia. While efforts are made to ensure that all the information hereto are good, accurate and up to date, by visiting the website Tourismcambodia.org, viewing, accessing or otherwise using any of the services or information created, collected, compiled or submitted to Tourismcambodia.org, you agree to be bound by the our Terms and Conditions of Use, (Click here). If you do not want to be bound by our Terms, your only option is not to visit, view or otherwise use the services of Tourismcambodia.org. You understand, agree and acknowledge that these Terms constitute a legally binding agreement between you and Tourismcambodia.org and that your use of Tourismcambodia.org shall indicate your conclusive acceptance of this agreement.