ក្រសួងទេសចរណ៍រៀបចំកម្មវិធី «រាត្រីកម្ពុជា» នៅក្រុងហូជីមិញ ភ្ជាប់ជាមួយការផ្សព្វផ្សាយគោលដៅទេសចរណ៍ នាឱកាសពិព័រណ៍ ITE ឆ្នាំ២០១៩។

ក្រសួងទេសចរណ៍រៀបចំកម្មវិធី «រាត្រីកម្ពុជា» នៅក្រុងហូជីមិញ ភ្ជាប់ជាមួយការផ្សព្វផ្សាយគោលដៅទេសចរណ៍ នាឱកាសពិព័រណ៍ ITE ឆ្នាំ២០១៩។

(ហូជីមិញ-វៀតណាម)៖ នាឱកាសដែលសាធារណរដ្ឋសង្គមនិយមវៀតណាម រៀបចំពិព័រណ៍ ITE-HCMC លើកទី១៥ នៅទីក្រុងហូជីមិញ ក្រសួងទេសចរណ៍កម្ពុជា បានរៀបចំពិធីលៀង សាយភោជន៍ «រាត្រីកម្ពុជា-Cambodia Night ឆ្នាំ២០១៩» យ៉ាងអធិកអធមនៅកណ្ដាលក្រុងហូជីមិញ ដើម្បីបង្កើននូវការផ្សព្វផ្សាយពីគោលដៅ និងសក្ដានុពលទេសចរណ៍របស់កម្ពុជា ទៅកាន់ក្រុមហ៊ុនទីភ្នាក់ងារទេសចរណ៍ ភ្ញៀវទេសចរ ក៏ដូចជាជំរុញកិច្ចសហប្រតិបត្តិការលើវិស័យទេសចរណ៍ផងដែរ។
រាត្រីកម្ពុជា ឬ Cambodia Night ឆ្នាំ២០១៩នេះ ត្រូវបានរៀបចំឡើងនៅសណ្ឋាគារ Rex នារាត្រីថ្ងៃទី០៥ ខែកញ្ញា ក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍កម្ពុជា ក្នុងនោះក៏មានការចូលរួមពីលោកស្រី Phan Thi Thang អនុប្រធានក្រុមប្រឹក្សាប្រជាជនក្រុងហូជីមិញ លោក U Myint Htwe អគ្គនាយករងនៃក្រសួងសណ្ឋាគារ និងទេសចរណ៍មីយ៉ាន់ម៉ា កញ្ញា Sengsoda Vanphanoukvong អនុប្រធាននាយកដ្ឋានទីផ្សារ នៃក្រសួងព័ត៌មាន វប្បធម៌ និងទេសចរណ៍ឡាវ ព្រមទាំងមន្ត្រីរដ្ឋការ តំណាងក្រុមហ៊ុនទីភ្នាក់ងារទេសចរណ៍ និងបណ្ដាភ្ញៀវកិត្តិយសជាច្រើនកុះករ។
ថ្លែងទៅកាន់ភ្ញៀវកិត្តិយសដែលចូលរួមក្នុងកម្មវិធីរាត្រីកម្ពុជានោះ ឯកឧត្តមរដ្ឋមន្ត្រី ថោង ខុន បានឱ្យដឹងថា នៅក្នុងការរៀបចំពិព័រណ៍ ITE-HCMC ឆ្នាំ២០១៩នេះ ជាឆ្នាំទី១៥ហើយ ដែលក្រសួងទេសចរណ៍កម្ពុជា បានចូលរួមសហការគាំទ្រ ដោយបាននាំយកអ្នកទិញ និងអ្នកលក់កាន់តែច្រើនមកជួបជុំគ្នា និងផ្គូរផ្គងដៃគូធុរកិច្ចជាមួយគ្នា សំដៅជំរុញការផ្សព្វផ្សាយគោលដៅទេសចរណ៍របស់ប្រទេសទាំងពីរ ឱ្យកាន់តែទូលំទូលាយជាសកល។
ឯកឧត្តម ថោង ខុន បានថ្លែងទៀតថា ក្រៅពីសក្តានុពលនៃទេសចរណ៍វប្បធម៌ និងធម្មជាតិដ៏សម្បូរបែប កម្ពុជាមានឆ្នេរសមុទ្រប្រវែង ៤៤០គីឡូម៉ែត្រ និងមានមោទនភាព ដែលបានក្លាយជាសមាជិកក្លឹបឆ្នេរសមុទ្រ ដែលស្អាតជាងគេលើពិភពលោកដូចវៀតណាមផងដែរ ដែលសក្តិសមនឹងការប្រសិទ្ធនាមថា «កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្តៅ» ហើយរាជរដ្ឋាភិបាលក៏បានដាក់ចេញនូវគោលនយោបាយជាតិស្តីពី អេកូទេសចរណ៍ ដើម្បីជំរុញវិស័យអេកូទេសចរណ៍ និងទេសចរណ៍សហគមន៍ សំដៅទាក់ទាញទេសចរក្នុងតំបន់។
នាដើមឆ្នាំ២០១៩នេះ ចំពោះការធ្វើដំណើរដោយប្រើប្រាស់យានយន្តផ្ទាល់ខ្លួន (self-driving tour) ពីវៀតណាមទៅកម្ពុជា គឺមិនតម្រូវឲ្យបង់ប្រាក់កក់ ឬធានារ៉ាប់រង និងអាចវិលចូលមកវៀតណាមវិញតាមច្រកអន្តរជាតិរបស់កម្ពុជាណាមួយក៏បាន។ យោងតាមស្មារតីនៃកិច្ចសហប្រតិបត្តិការច្រករបៀងខាងត្បូងនៃមហាអនុតំបន់ទន្លេគង្គ កម្ពុជាមានគោលបំណងក្នុងការបង្កើតផ្លូវសមុទ្រជាមួយវៀតណាម នៅពេលដែលកំពង់ផែទេសចរនៅខេត្តកំពតបញ្ចប់ការសាងសង់ នៅឆ្នាំ២០២១ ដែលក៏ជាការរួមចំណែកដ៏សំខាន់មួយដល់ការអនុវត្តសេចក្តីប្រកាសអាស៊ានស្តីពី ទេសចរណ៍តាមនាវា។
ទន្ទឹមនឹងការខិតខំជំរុញការផ្សព្វផ្សាយ ការពង្រឹង និងអភិវឌ្ឍន៍ផលិតផលទេសចរណ៍ ការសម្រួល ការធ្វើដំណើរ និងដឹកជញ្ជូន កម្ពុជាក៏យកចិត្តទុកដាក់ពង្រឹងគុណភាពសេវាកម្មទេសចរណ៍ស្តង់ដាបៃតង តាមរយៈចលនាប្រឡងប្រណាំងរមណីយដ្ឋានស្អាត សេវាល្អ បដិសណ្ឋារកិច្ចល្អ និងការបណ្តុះបណ្តាលអប់រំវិជ្ជាជីវៈ «បុគ្គលិកម្នាក់ ជំនាញមួយ» និង «សេវាមួយ ស្តង់ដាមួយ» ស្របតាមស្តង់ដាអាស៊ាន។
ឯកឧត្តមរដ្ឋមន្ត្រី ថោង ខុន បានអះអាងថា «កម្ពុជានឹងទទួលបានវិនិយោគិន និងទេសចរពីគ្រប់ទិសទី ពិសេសទេសចរវៀតណាមកាន់តែច្រើនថែមទៀត ព្រោះយើងមានផលិតផលទេសចរណ៍ថ្មីៗជាច្រើនកំពុងរង់ចាំ»។
ឆ្លៀតក្នុងឱកាសនោះ ឯកឧត្តម ថោង ខុន បានអញ្ជើញវិនិយោគិន និងភ្ញៀវទេសចរគ្រប់ជាតិសាសន៍ ជាពិសេសជនជាតិវៀតណាមទៅវិនិយោគ និងទស្សនានៅកម្ពុជា ដើម្បីស្វែងយល់នូវបទពិសោធន៍ថ្មីៗ ដោយកម្ពុជានឹងរៀបចំពិព័រណ៍ទេសចរណ៍ «កម្ពុជាអន្តរជាតិលើកទី៣ (Cambodia Travel Mart-CTM 2019)» ពីថ្ងៃទី១១-១៣ ខែតុលា ឆ្នាំ២០១៩ នៅរាជធានីភ្នំពេញ ក៏ដូចជាព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ ពីថ្ងៃទី១០-១២ ខែវិច្ឆិកា ឆ្នាំ២០១៩ នៅរាជធានីភ្នំពេញ និងបុណ្យសមុទ្រពីថ្ងៃទី២០-២២ ខែធ្នូ ឆ្នាំ២០១៩ នៅខេត្តកំពតជិតកោះភូគួក របស់វៀតណាម។
ឯកឧត្តមបានបន្តថា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា កម្ពុជាមានសុខសន្តិភាព ស្ថិរភាពនយោបាយ និងការរីកចម្រើនលើគ្រប់វិស័យ រួមទាំងវិស័យទេសចរណ៍។
ឯកឧត្តមរដ្ឋមន្ត្រីបានបន្ថែមថា វៀតណាម និងកម្ពុជា ក៏មានកំណើនពាណិជ្ជកម្មតាមបណ្តោយព្រំដែន និងទេសចរណ៍ផងដែរ។
កិច្ចសហប្រតិបត្តិការលើវិស័យទេសចរណ៍រវាងប្រទេសទាំងពីរ មានការរីកចម្រើនគួរឲ្យកត់សម្គាល់ពីមួយឆ្នាំទៅមួយឆ្នាំ តាមរយៈការអនុវត្តកិច្ចសហប្រតិបត្តិការទ្វេភាគី ស្តីពីកិច្ចសហការផ្សព្វផ្សាយរួមគ្នា «ប្រទេសពីរ គោលដៅតែមួយ» ដែលជាផ្នែកមួយនៃផែនការយុទ្ធសាស្រ្តសម្រេចបាននូវការទទួលបានភ្ញៀវទេសចរវៀតណាមចំនួន ១លាននាក់ មកកម្ពុជា និងភ្ញៀវទេសចរកម្ពុជា ៥០ម៉ឺននាក់ មកប្រទេសវៀតណាម នៅឆ្នាំ២០២០៕

This website, Tourismcambodia.org, the official website of Ministry of Cambodia of the Kingdom of Cambodia, is designed and maintained collaboratively by RED DOT (Cambodia) Co., Ltd and Cybernetics Ltd a full service branding and advertising agency in Cambodia. While efforts are made to ensure that all the information hereto are good, accurate and up to date, by visiting the website Tourismcambodia.org, viewing, accessing or otherwise using any of the services or information created, collected, compiled or submitted to Tourismcambodia.org, you agree to be bound by the our Terms and Conditions of Use, (Click here). If you do not want to be bound by our Terms, your only option is not to visit, view or otherwise use the services of Tourismcambodia.org. You understand, agree and acknowledge that these Terms constitute a legally binding agreement between you and Tourismcambodia.org and that your use of Tourismcambodia.org shall indicate your conclusive acceptance of this agreement.