សហភាពសហព័ន្ធយុវជនកម្ពុជាប្រារព្ធពិធីបុណ្យចូលឆ្នាំ២០២៣ រយៈពេលប្រាំបីថ្ងៃនៅខេត្តសៀមរាប
សហភាពសហព័ន្ធយុវជនកម្ពុជា (ស.ស.យ.ក.) ខេត្តសៀមរាប ពីម្សិលមិញបានចាប់ផ្ដើមប្រារព្ធពិធីបុណ្យអបអរសាទរចូលឆ្នាំសាកល២០២៣ នៅតាមបណ្ដោយដងស្ទឹងសៀមរាប ខេត្តសៀមរាប។ ពិធីបុណ្យនេះមានរយៈពេលប្រាំបីថ្ងៃ គឺចាប់ពីថ្ងៃម្សិលមិញរហូតដល់ថ្ងៃទី១ ខែមករា ឆ្នាំ២០២៣។
លោក លី វណ្ណៈ នាយករដ្ឋបាលខេត្តសៀមរាប បានប្រាប់កាសែត ខ្មែរថាមស៍ ពីម្សិលមិញថា សហភាព
សហព័ន្ធយុវជនកម្ពុជាបានសហការណ៍ជាមួយរដ្ឋបាលខេត្តសៀមរាបរៀបចំប្រារព្ធពិធីតាមទីសាធារណៈ ដើម្បីស្វាគមន៍ពិធីបុណ្យណូអែល និងអបអរសាទរការចូលមកដល់ឆ្នាំ
២០២៣ ដោយសង្ឃឹមថាព្រឹត្តិការណ៍នេះនឹងទាក់ទាញភ្ញៀវទេសចរជាតិនិងអន្តរជាតិមកលេងកម្សាន្ត១៧ម៉ឺននាក់។
លោកបន្តថា ឆ្នាំនេះរដ្ឋបាលខេត្តសៀមរាបមានការរៀបចំកម្មវិធីកម្សាន្តជាច្រើន ដូចជាការតាំងពិព័រណ៍ ការជិះទូកកម្សាន្តតាមដងស្ទឹងសៀមរាប ផ្សារទឹក ការប្រគំតន្រ្តីស្គរដៃជាដើម ដែលកម្មវិធីទាំងនេះត្រូវបានរៀបចំនៅបរិវេណសួនច្បារព្រះរាជដំណាក់ និងតាមបណ្ដោយស្ទឹងសៀមរាប។
លោកបន្ថែមថា៖ «ភ្ញៀវទាំងអស់ត្រូវបានអនុញ្ញាតឱ្យចូលរួមដោយសេរីក្នុងស្វែងយល់ពីវប្បធម៌ ទំនៀបទម្លាប់ ប្រពៃណីរបស់ប្រជាជនខ្មែរ។ ជាពិសេសព្រឹត្តិការណ៍នេះវានឹងចូលរួមលើកកម្ពស់សេដ្ឋកិច្ចរបស់ប្រជាពលរដ្ឋនៅក្នុងខេត្ត តាមរយៈភ្ញៀវទេសចរជាតិនិងអន្តរជាតិមកចូលរួមអបអរសាទរពិធីបុណ្យចូលឆ្នាំ២០២៣ ដែលមានរយៈពេលដល់ទៅប្រាំបីថ្ងៃ»។
ជាមួយគ្នានេះ រដ្ឋបាលខេត្តសៀមរាបស្នើឱ្យម្ចាស់អាជីវកម្មទាំងអស់កុំដំឡើងថ្លៃបន្ទប់ស្នាក់ហួសហេតុ ដែលធ្វើឱ្យប៉ះពាល់អារម្មណ៍ភ្ញៀវទេសចរ និងដើម្បីស្ថេរភាព
វិស័យទេសចរណ៍ក្នុងខេត្តសៀមរាបជាដើម។
ក្រៅពីពិធីបុណ្យខាងលើ ខេត្តសៀមរាបកំពុងត្រៀមខ្លួនសម្រាប់ព្រឹត្តិការណ៍ដ៏សំខាន់មួយទៀត គឺការប្រារព្ធព្រឹត្តិការណ៍អង្គរសង្រ្កាន្តឆ្នាំថ្មីប្រពៃណីជាតិដែលផ្អាករយៈពេលបួនឆ្នាំដោយសារតែបញ្ហាជំងឺកូវីដ-១៩ ខណៈរដ្ឋបាលខេត្តសៀមរាបកំពុងគិតគូរពីការរៀបចំសណ្ដាប់ធ្នាប់និងលំហូរចរាចរណ៍កុំឱ្យកកស្ទះ។
លោក សុខ សប្បាយណា ប្រធានក្រុមប្រតិបត្តិព្រឹត្តិការណ៍អង្គរសង្ក្រាន្ត បានឱ្យដឹងថា អង្គរសង្រ្កាន្តឆ្នាំថ្មីប្រពៃណីជាតិនឹងប្រព្រឹត្តទៅនៅថ្ងៃទី១៤ ដល់ថ្ងៃទី
១៦ ខែមេសា ឆ្នាំ២០២៣ នៅក្នុងបរិវេណរមណីយដ្ឋានអង្គរ ដើម្បីចូលរួមបំផុសគំនិតស្មារតីប្រជាជនកម្ពុជាពីមោទកភាព ការស្រឡាញ់វប្បធម៌ និងទំនៀមទម្លាប់ដែលជាអត្តសញ្ញាណជាតិ។
លោកបន្តថា ព្រឹត្តិការណ៍អង្គរសង្ក្រាន្តក្នុងឆ្នាំនេះនឹងមានលក្ខណៈកាន់តែលេចធ្លោជាងបណ្ដាឆ្នាំមុនៗ ដោយមានការប្រមូលផ្ដុំនូវកម្មវិធីព្រឹត្តិការណ៍ ក៏ដូចជាតួអង្គនិមិត្តរូប
សំខាន់ៗជាច្រើនដែលឆ្លុះបញ្ចាំងតាមរយៈកម្មវិធីដែលបានកំណត់។
លោក ហូ វណ្ឌី ទីប្រឹក្សាសភាពាណិជ្ជកម្ពុជានិងទីប្រឹក្សាសមាគមន៍ទីភ្នាក់ងារទេសចរណ៍កម្ពុជា បានលើកឡើងថា ព្រឹត្តិការណ៍ដែលអាជ្ញាធរខេត្តសៀមរាបកំពុងតែរៀបចំប្រារព្ធធ្វើឡើងនេះ ជាការស្រូបទាញទេសចរក្នុងស្រុក ក៏ដូចជាការបំពេញដល់វិស័យទេសសចរណ៍ដែលបានរងការប៉ះពាល់យ៉ាងខ្លាំងដោយសារតែជំងឺកូវីដ-១៩។
លោកសង្ឃឹមថា ក្នុងឆ្នាំ២០២៣ វិស័យទេសចរណ៍នឹងមានការរីកចម្រើនឡើងវិញ ហើយតាមរយៈព្រឹត្តិការណ៍ដែលអាជ្ញាធរកំពុងតែរៀបចំប្រារព្ធនេះ ពលរដ្ឋប្រាកដជាទទួលបានចំណូលសេដ្ឋកិច្ចផ្ទាល់ខ្លួន ចំណូលសេដ្ឋកិច្ចគ្រួសារ និងចំណូលសេដ្ឋកិច្ចជាតិ។
លោកបន្តថា សៀមរាប ជាខេត្តមួយដែលទទួលទេសចរច្រើនពីមួយឆ្នាំទៅមួយឆ្នាំដែលមិនមានបាតុភាពកើតឡើងដោយសារបញ្ហាការផ្ដល់សេវាកម្មខុសប្រក្រតីដូចខេត្តដទៃទេ។ ដូច្នេះដើម្បីរក្សាទំនុកចិត្តទេសចរ សូមប្រតិបត្តិករក្នុងវិស័យទេសចរណ៍គប្បីបន្តអនុវត្តតាមគោលការណ៍របស់ក្រសួងទេសចរណ៍ ក៏ដូចជាអនុសាសន៍របស់រដ្ឋាភិបាល។
លោកបន្ថែមថា៖ «តាមបណ្ដាខេត្តផ្សេងៗទៀតដែលមានទេសចរចេញចូលគួរមានការរក្សាគុណភាពសេវាកម្ម ក៏ដូចជាក្រមសីលធម៌វិជ្ជាជីវៈ ដើម្បីចៀសវាងការប៉ះពាល់អារម្មណ៍ភ្ញៀវទេសចរណ៍ ដែលធ្វើឱ្យពួកគេបាត់ទំនុកចិត្តលែងមកកម្សាន្តក្នុងខេត្តនោះបន្តទៀត»៕
